Fráfaringarløta var aftur her í skúlanum í farnu viku, tí heilsufrøðingur okkara, Elsa Mortensen, fór frá fyri aldur. 

Mánadagar og mikudagar hevur Elsa verið trúføst í Sankta Frans skúla í samfull 29 ár. Hon byrjaði annars sum heilsufrøðingur ella heilsusystir, sum tað tá æt, í 1978. Tey fyrstu árini arbeiddi hon burtur av á smábarnaøkinum, men í 1992 byrjaði hon at starvast í Sankta Frans skúla. 

Vit takka Elsu fyri hennara týdningarmikla íkast til skúlan og teir mongu næmingarnar, sum hava gingið her í hennara starsvstíð. Elsa er rúmlig og hjartagóð av lyndi, og hesum eginleikunum hava vit mangan notið gott av bæði í góðum og minni góðum støðum.

Til seinast kunnu vit nevna, at Elsa er gift við Óla Mortensen, sum í meira enn 40 ár starvaðist her í skúlanum sum lærari og telduvørður, og hon er mamma Gunn Mikkelsen, sum eisini er lærari her.

Við tøkk og vón um nógv frálík ár framyvir.

Tekstur og mynd: Katrin Erlendsdóttir