Loppusølan 5. desember 2025
Árliga loppusølan á Sankta Frans skúla verður 5. desember. Til loppusøluna skulu allir næmingar finna okkurt, sum teir kunnu hava við at selja s.s. leikur, tey ikki spæla við longur, ov lítil klæði, heimabundið, bøkur/bløð tey ikki lesa longur o.s.fr.
Tey kunnu eisini hava smákøkur, góðgæti (IKKI popkorn) ella líknandi við at selja, men so má tað vera innpakkað.
7. flokkarnir hava café, og 8. og 9. flokkarnir plaga at selja upplivingar.
Prísirnir á vørunum skulu liggja ímillum 1 kr. og 10 kr. Um tað er okkurt heilt serligt, kann tað kosta 15- 20 kr., men ikki meir.
Næmingarnir mugu eisini hava eitt sindur av leysum peningi við at keypa fyri - also myntir 1, 2, 5 og 10 kr. er gott at hava. 50-100 kr. plagar at vera passaligt.
Dagurin fer fram soleiðis:
1. og 2. tíma: Vit seta vørurnar hjá okkum fram og prísa tær.
Eftir fríkorterið og fram til kl 11.00: Sølan byrjar, og vit skiftast um at passa okkara handil, og at gang runt á skúlanum og keypa.
Kl 11.00-11.20: Vit rudda loppusøluna av
Allur innkomni peningurin verður latin vælgerandi endamáli, sum fevnir um børn í Føroyum.
Byrjunarlesing (4. september 2025)
Øll børnini í 1.d hava fingið eina reyða lesimappu heim við í dag. Tey skulu lesa hvønn dag í umleið 10 min., har onkur vaksin situr hjá og stuðlar teimum. Í fyrstuni skulu børnini stava orðini so hvørt, tey verða lisin, t.d. s-ó-l-i-n, sólin. Hetta gera vit í fyrstuni fyri, at bókstavir og ljóð skulu festa seg væl í minnið, og fyri at børnini lættari skulu hoyra ljóðini, sum forma orðið. Hetta forðar eisini fyri, at tey bara sita og gita seg ígjøgnum tekstin.
Tað er týdningarmikið, at lisið verður við barninum, ímeðan tað er vælupplagt, og at tit merkja eftir, nær tað hevur sitið nóg leingi við lesingini. Fyri summi eru 10 min. lítið, og tey megna og tíma væl at lesa longri, ímeðan fyri onnur eru 10 min. í so leingi, og tey troyttast skjótt - so mugu tey heldur lesa í eini 5-8 min. Tað er umráðandi, at vit fremja lesihugin, heldur enn at køva hann.
Um børnini ynskja at lesa meiri, og tit meta, at tey megna hetta, eru tit vælkomin at supplera við øðrum tilfari. Nógv er at finna á býarbókasavninum.
Minnist somuleiðis til at fylla lesikortið út, hvørja ferð tit lesa.
Góðu tit foreldur í 1.d
Eg havi bert eina vinarliga heilsan til tykkara – bert eitt vinarligt orð á leiðini.
Um tit ynskja at rokna eitt sindur afturat heima ella gera aðrar læruríkar og stuttligar uppgávur saman við barninum, so vilja vit bara fegnast um tað. Tað er als ikki eitt krav, men altíð vælkomið, um tit vilja styrkja tað, vit longu arbeiða við í skúlanum.
Øll eyka venjing og læring er ein stór gáva fyri barnið – og tað, sum tit gera heima, styrkir bæði vitan, sjálvsálit og lærugleði. Tað órógvar als ikki okkara undirvísing – tvørturímóti, so riggar tað væl saman við tí, vit gera í skúlanum.
Vit gleða okkum at halda fram við einum góðum og gevandi skúlaári saman við tykkum og tykkara børnum.
Vinarliga og við blíðari heilsu
Jógvan Jákup
Roknilærari í 1.d