Allur Sankta Frans skúli var við til rørslufagnaðin fríggjadagin, tá fólk av øllum hugsandi slag leitaðu sær í Gundadal, sum í ár var karmur um tiltakið. Um 2.500 fólk vóru har fyri at taka undir við boðskapinum um at røra seg saman við øðrum uppá ein meiningsfullan máta.

Jensina Olsen hitaði upp við ymiskum undirhaldi og lærdi okkum øll ein nýggjan ABC sang, sum hon hevði gjørt. Tað gekk sum eftir ánni. Egga (Jógvan) Jensen var kosin til ársins ABC fyrimynd, og áðrenn vit øll fóru til gongu oman til Sjónleikarahúsið, klipti hann startbandið, og síðani fór fagnaðargongan avstað. 

Túrurin endaði uppi á Ovara vølli, har ein rúgva av virksemi var á skránni. Bóltspøl, posarenning, togtogan, boccia, fimleikur og annað.

Fólkaheilsuráðið skipar fyri rørslufagnaðinum, sum er eitt ABC-tiltak. Tey siga soleiðis: 

At røra seg er gott.
At gera tað saman við øðrum er enn betri
Og at gera tað á ein stuttligan, meiningsfullan og litríkan hátt, er ein sonn frøi

Tekstur: Katrin Erlendsdóttir