Í dag, 16. juni 2025, var ein serligur og søguligur dagur fyri okkum her á Sankta Frans skúla. Hjørdis Gaard gjørdist fyrsti næmingur nakrantíð, sum hevur lokið 9. floks prógv hjá okkum, og fekk hon heiðurin at vinda flaggið á stong í morgun.

Ynski um at fáa framhaldsdeild á Sankta Frans skúla byrjaði heilt aftur í 1960'inum, og loksins í 2023 byrjaði fyrsti 8. flokkur og sostatt hádeildin. Tí hevur hesin dagurin og hendan løtan leingi verið eitt ynski hjá Sankta Frans skúla.

Vit eru sera errin av okkara næmingum og teirra avbera góðu úrslitum. Vit vilja ynskja øllum, sum hava verið uppi í próvtøku í dag, til lukku og góða eydnu til tey, sum fara upp í morgin.

Prógvhandan verður í fimleikahøll skúlans, mikudagin 18. juni kl. 17.00.