Tað liggur væl fyri hjá Gabriel við Skipá í 6.b at fiska. Tað mugu vit sanna, nú árliga fiskikappingin fyri 6. flokkar í Tórshavnar kommunu er av.
Gabriel fekk tann størsta fiskin av øllum í kappingini, ein stóran tosk, ið vigaði 12,8 kg. Afturfyri fekk Gabriel fríggjamorgunin handað ein vinning, ið var ein toskatráða frá Jógvani Weihe, og allir næmingar í 6.b fingu sodavatn, somuleiðis frá Jógvani Weihe.
Tað var tó ikki nóg mikið við hesum eina stóra toskinum, segði Claus Reistrup, fyriskipari, í røðu síni í flokkinum, tí tað var eisini Gabriel, sum fekk næststørsta fiskin á túrinum hjá 6.b. Hetta var ein upsi, ið vigaði yvir 9 kg.
Jens Marius Poulsen frá Westward Ho greiddi flokkinum frá, hvussu Føroyar broyttist frá bóndasamfelagi til fiskivinnusamfelag, tá føroyingar keyptu sluppir í hópatali úr Onglandi og harvið gjørdu sær fiskiskap til vinnuveg. Ein áhugaverd løta.
Vit ynskja Gabriel hjartaliga til lukku við fonginum.
Ein serlig tøkk til manningina á Westward Ho og Jógvan Weihe fyri vinningin.
Ragnar Simonsen, lærari í 6.b, og Aslaug Olsen, skúlastjóri, vóru við 6.b, tá flokkurin var til fiskiskap tann 1. september.
Sum prikkurin yvir i'num, so vann flokkurin eisini kappingina. Til lukku øll somul!
Myndir: Katrin Erlendsdóttir og Aslaug Olsen.