SKÚLANÝTT
Jólahald
19/12-2018

Nú tað stundar til jólaferiuna, hava árligu jólahaldini aftur verið í Sankta Frans skúla. Forskúlin og 1. flokkur høvdu jólahald týsdagin, meðan eldru flokkarnir høvdu mikudagin. Sum siðvenja er her, syngja vit altíð fyrst nakrar jólasangir, meðan vit dansa um træið. Aftur í ár var Niels Heðin Gaard Joensen so beinasamur at spæla harmoniku til sangin hjá okkum, og tað takka vit honum fyri. Aftaná sangin hoyra vit altíð jólaevangeliið, og síðani er tað leikurin, sum hjá nógvum er eitt hæddarpunktið hendan dagin. Í ár vóru tað dugnaligu næmingarnir í 5. a og 5. b við Anniku Restorff Holm og Jónu Joensen, sum framførdu ein flottan leik við nógvum tónleiki fyri okkum. Og aftur í ár endaðu jólamenninir løtuna fyri okkum, tá teir komu við karamellum til okkum øll. Síðst men ikki minst, bíðaðu bomm og sodavatn eftir okkum, tá vit komu inn á stovurnar aftaná. Tá jólahaldið í Sankta Frans er av, kunnu jólini gott koma.

katrin e / ingo