Fríggjadagin 29. des. andaðist Odny Thomsen, sum í mong ár var knýtt at forskúlanum hjá okkum. Odny var ættað av Eiði. Kom ung til Havnar at arbeiða hjá Frants Restorff og giftist í 1969 við Tummas Paula Thomsen. Seinni fór hon í vøggustovuna og barnagarðin hjá nonnunum í grannalagnum at virka. Væl lá fyri hjá eiðisgentuni at vera millum tey smáu. Hevði gott handalag og tak á yngra ættarliðnum.
Í 1979 varð hon biðin at koma í forskúlan. Odny kendi ráð og reglur, sum fransiskanarasystrarnar fyriskipaðu og tók av. Trúføst passaði hon sítt starv. Fekk ringa sjúku at dragast við í 1987, ið elvdi til eina nýratransplantatión. Tað gleddi okkum øll, at hon kom aftur í skúla við fullari arbeiðsorku. Hon helt fram við góðum treysti í forskúlanum fram til 2006/07, tá nýravirknið aftur gjørdi vart við seg skeiva vegin.
Hon bað seg úr starvi. Men alla tíðina, síðani hon fór, fylgdi hon við skúlanum. Hon var sermerkt í nógvar mátar, - trúføst, vinsæl og tók til sín ólekiligu sjúkuna sum nakað, sum var hennara lívslutur. Onnur høvdu okkurt verri at dragast við, helt Odny.
Hon hevði fylt 69 ár nú nýggjarsaftan.
Hvíl í friði. Skúlin fer at minnast teg fyri orku og lívsvilja - at stríðast við ringa sjúku og kortini at vera takksom fyri tað, tær untist.